السمو فى الحب

" السمو فى الحب " مش عارفة ليه بالذات " سمو " بس ديه احسن صفة ممكن اوصفها للحالة ديه ،هى حالة او مرحلة مش كتير بيوصلولها او بيحسوها ... هى جميلة اوى وصعبة اوى مش اى حد يستحمل صعوبتها بس جمالها ممكن ينسينا انها صعبة !

السمو فى الحب إن حُبكَ يوصل لدرجة إنك مش مستنى فيها مقابل من إلى بتحبه ،هو انت بتحبه وبتحب تشوفه سعيد على طوول وبتحس به فى كل اوقاته ومن غير ما يتكلم بتقرا جواه عينه ايه ،بتفهمه من غير ما ينطق عارف ايه جواه منه ،عارفه كويس لدرجة انك تحسه حتة منك او هو انت ...

المرحلة ديه عقبال ما توصل لها هيمر عليك حاجات كتير جدا وحشة وحلوة ومؤلمة ،بس لما توصلها ما تضيعيش الحاجات الحلوة الى فيها كده ولا تضيع الى بتحبه ....

فى المرحلة ديه خلاص هتكون راضى فيها بالى بتحبه ،متقبل عيوبه قبل مميزاته ،هتشوفه حلو دايما ،أجمل واحد كأن مافيش غيره !

هترضى معاه بكل حاجة حتى لو صغيرة بس هتبقى مبسوط وانت معاه

بتحبه وبتديله مشاعرك ومش هتستنى منه مقابل ،هو انت بتحبه ومهما غاب فيهفضل حبه جوه منك ..

مرحلة السمو فى الحب ،هى مرحلة كل رغبات الدنيوية فيها بتزول وبيبقى الحب بنقائه جواك لحبيبك ...

مرحلة السمو هو انك بتكمل الى ناقص فيك بمحبوبك وهو بيكملك ..إكتمال الروح أسمى مراحل الحب ...

عطاء بلا مقابل تفهم حب مودة ورحمة وجمال فى التعامل وحتى الإختلاف فى تقبل لإن الإختلاف اكيد هيكون موجود .

مش كتير الى بيوصلوا للمرحلة ديه ،ومش كتير الى يقدروا عليها ،ماتفرطش فى حب نقى عشان النقاء مش بيتعوض .. 

منة عامر