كوباية الماية

إحنا عاملين زى كوباية الماية ..
مش فى مَثل بيقول " بص لنص الكوباية المليان "
أهو إحنا أتنين فى بعض كده نصنا المليان ده الجزء المتفائل فينا
ونصنا الفاضى ده الجزء المتشائم إلى دايما بييأس لأنه فاضى من جوه مافيهوش حاجة .....
أما المتفائل فكله أمل ونور ومايه وكهرباء
يعنى بعد كده لما نقول " بص على نص الكوباية المليان " يعنى بص لنصك الإيجابى للحاجات الى عندك مش عندك غيرك لمواهبك أحلامك وأملك فى الحياة .. بص لربنا قوله الحمد لله على كل حاجة انت اتدهالى بس يارب قدرنى أعرف أستخدمها صح وحقق مُرادك فى خلقكَ ليا كإنسان مُعمر للأرض.
كل يوم بقول هو انا متشائمة ولا متفائلة ... بكتب عن الأحلام والسعادة والنجاح بس هل انا من جوايا حاسهم فعلا .. مؤمنة بالكلام إلى بكتبه وبقوله للناس بجد ولا اى حاجة كده والسلام !؟؟
لاقتنى بقول : ساعات بكون مؤمنة وساعات بكون فاقدة الأمل فى كل شئ حتى فى نفسى وعايشة فى ماضى عمره ما هيكون حاضر ولا مستقبل !!...
ديه حقيقة بتعايش معها كل يوم بحاول أبعدها لكن هى لاصقة فيا بشكل غبى جداً ..
فمالقتش إجابة لسؤال ده غير إننا ممزوجين بعجينتين " تفائل وتشائم " يعنى فاضين ومليانين زى كوباية الماية ..
بس الجدع أوى هو إلى يعرف يخلى الماية أكتر من الفراغ وكل ما يعطش يسقى نفسه ماية من جزءه المليان ويفكر نفسه هو ايه عند ربنا ...
وكل ما يحس ان مافيش أمل يسقى نفسه تانى من جزءه المليان لحد ما يرتوى ،هياخد وقت عشان يرتوى خالص بس المهم انك ما تيأسش من إنك تشرب كل يوم من جزئك المليان لحد ما ترتوى منه ويبقى كامل فيك ...

منة عامر