" عامريات " ג

إستمتع بكل لحظة فى حياتك وإنت داخل تنام وبتحاول وعمال تتاوب وتقرأ قرآن إستمتع بها ,

 إستمتع بأحلامك وقرر إنك هتكون مبسوط جوه حلمك " أه " قرر إنك تحلم بحلم سعيد أو تحلم بحد بتحبه ولما تصحى إستمتع بلحظة صحيانك ديه وأحمد ربنا إن داك يوم جديد تقدر تغير فى حاجات كتير ومتكررش الغلط إلى أنت عملته إمبارح ,

إستمتع بكل لحظة فى حياتك عشان هى مش هتتكرر,

 إستمتع بلحظة ملل وأنت فى الشغل وقاعد مش لاقى حاجة تعملها ,

 إستمتع وأنت راكب الميكروباص والدنيا زحمة ,

إستمتع بلحظة حد حاكلك فيها  حاجة ووثق فيك ,

إستمتع بلحظات إنكسارك وإتعلم منها كويس وقوم أقوى من الأول,

إستمتع بكل حاجة بلحظة بدايتك فى كتاب جديد تقرأه وتحس بسعادة وأنت بتشم ورقه الجديد :D

إستمتع بكل لحظة مع صحابك وإنتم بتضحكوا مع بعض على حاجة حصلت,

إستمتع وأنت قاعد فى المحاضرة ومش فاهم حاجة , والدكتور يقولك إنه " مفيش أمل "فيك :D

إستمتع بكل حاجة لأنها ممكن تكون آخر حاجة ,

إستمتع بحد سابك وأعرف إنه ماعرفش قيمتك كويس فعشان كده سابك,

إستمتع بكل وقت صعب بيمر عليك عشان أنت وقتها هتعرف إنت تقدر تواجه كل موقف فى حياتك ولا لأ ,

إستمتع بلحظة الفراق وإعرف إن إلى بيحبك هيفضل جنبك وإن إلى ربنا كتبه هتشوفه مهما حصل ,
إستمتع لما تقع فى الحب وإهتم بكل لحظة بتمر عليك وأنت مع إلى بتحبه ,

إستمتع بكلمة حلوة خارجة من حد لسه عارفه جديد وبيقولها فى حقك ,

إستمتع وأنت رايح تقدم على شغل وتحس إن كل الناس بصالك ,

إستمتع إنك أثرت فى ناس كتير وغيرت حياتهم للأحسن ,

إستمتع بلحظة "والدك ووالدتك" بيزعقوا فيك عشان أتأخرت ما هما خايفين عليك,

إستمتع وأنت بتحدى نفسك وتقولها لأ أنا هقدر أعمل إلى أنا عايزه ,

إستمتع وأنت رايح فى عز الساقعة تتوضى عشان تصلى وتقف بين إيد إلى خلقك إلى هو عارفك أكتر منك ,

 إستمتع وأنت بتتكلم مع ربنا وبتشكيله همك لأنه أكتر واحد حاسس بك وهيساعدك , إستمتع عشان ممكن تكون آخر مرة تقف بين إيد ربنا ,

إستمتع وأنت فاهم كل حاجة بتحصل حواليك بس مش مبين,

إستمتع حتى وأنت ساكت مش بتقول حاجة عشان إلى بيفهمك هيفهم سكوتك ده,

إستمتع بلحظة إنتصار وإنجاز عملته فى حياتك وسجله عندك عشان كل ما تحس باليأس تفتكر إنك نجحت قبل كده وتقدر تنجح تانى,

إستمتع وحب نفسك بكل حاجة فيها عيوبها ومميزتها لأنها تستحق إنك تحبها ,

إستمتع بموسيقى حلوة سمعتها وسرحت فيها , إستمتع إنك عملت حاجة محدش عملها وإعمل حاجة تانية محدش عملها,

إستمتع بمواهبك وما تركنهاش إستغلها , إستمتع بصحتك وأهتم بنفسك,

إستمتع بكل حاجة وأى حاجة الحياة مش مستاهلة " دراما " على الفاضى وأعرف إن كل حاجة لها سبب وحكمة مش هتعرفها غير وقتها وممكن ما تعرفهاش خالص ..

المهم إفتكر إنك تستمتع بكل لحظة فى حياتك عشان ممكن تكون آخر لحظة فى حياتك ..

إستمتع بكل حاجة فيك وكل لحظة بتمر عليك وأى حاجة بتحصلك ,

إحلم وحقق أحلامك ,

 إعرف نفسك وطورها ,

 أعبد ربك ,

أتقن عملك وإحسن فيه ,

 إقرأ كتب على أد ما تقدر ^_^

حب وأتقى الله فيمن تحب ,

وإستمتع بكل حاجة بتعملها وكل لحظة بتعشها ... 

الحياة واحدة فعشها وأنت مستمتع بها ... 

    ^_^ 

    بقلم 

" منة عامر "